Նոր դարաշեմին դարձել ենք վկան,
Ազատ ու անկախ պետականության,
Ոսոխների դեմ տարած հաղթության:
Մեր սուրը փառքով դրեցինք պատյան,
Մեծ հաղթանակի օրն է ցնծալից,
Պարտվեց մահաշունչ ոսոխը դաժան,
Երգեր են հորդում զվարթ սրտերից:
ՀՀ պաշտպանության նախարարության 4-րդ զորամիավորումը կազմավորվել է 1997թ. հուլիսի 4-ին: Զորամիավորման առաջին հրամանատարն էր գեներալ-գնդապետ Յուրի Խաչատուրովը, այնուհետև` գեներալ-լեյտենանտ Մարտին Կարապետյանը, գեներալ-մայոր Սեյրան Սարոյանը, գեներալ-լեյտենանտ Արշալույս Փայտյանը, գեներալ-լեյտենանտ Վալերի Գրիգորյանը, գեներալ-մայոր Կամո Քոչունցը, գեներալ-մայոր Պողոս Պողոսյանը: Ներկայիս հրամանատարն է գեներալ-մայոր Անդրանիկ Մակարյանը:
Հուլիսի 28-ը տոնական օր էր Եղեգնաձորում, մեծ շուքով նշվելու էր 4-րդ զորամիավորման կազմավորման 16-րդ տարեդարձը: Դա իր բնույթով եզակի տոնակատարություն էր, որ նշվում էր մարզում, այլ ոչ թե զորամասերում: ՀՀ պաշտպանության նախարար Սեյրան Օհանյանի խոսքերով ասած «նման որոշումը պատահական չէր, ժողովրդի ծոցից ծնունդ առած և նրա անվտանգության երաշխավորը հանդիսացող ազգային բանակն իր ժողովրդի հետ պետք է դիմավորի բանակային յուրաքանչյուր տոն»: Ասվածի վկայությունն է այն փաստը, որ այդ օրվա եղեգնաձորյան լուսաբացը ուղեկցվեց զինվորական քայլերգերի ու ազգային մեղեդիների ելևէջներով, որոնք և բնականաբար հիշեցրին բնակչությանը օրվա տոնակատարության, օրվա խորհրդի մասին և անկախ տարիքից` յուրաքանչյուր եղեգնաձորցի շտապեց մասնակցելու հաղթանակների բովով անցած բանակի տոնակատարությանը:
Տոնահանդեսն սկսվեց առավոտ վաղ, մարզկենտրոն Եղեգնաձորի հրապարակը տոնական հանդերձանք ուներ հանդիսավոր պայմաններում էր նշվում 4-րդ բանակային կորպուսի կազմավորման 16-րդ տարեդարձը: Միջոցառմանը ՀՀ պաշտպանության նախարար Սեյրան Օհանյանի գլխավորությամբ մասնակցում էին նաև զինված ուժերի գլխավոր շտաբի պետ գեներալ-գնդապետ Յու. Խաչատուրովը, պաշտպանության նախարարի, զինված ուժերի գլխ. շտաբի պետի տեղակալներ, պաշտպանության բանակի, բանակային կորպուսների հրամանատարներ, զինված ուժերի վարչությունների պետեր, միավորումների և զորամասերի հրամանատարներ:
Մարզպետ Էդգար Ղազարյանի գլխավորությամբ այստեղ էին մարզային իշխանության ներկայացուցիչներ, համայնքային ու ուժային կառույցների ղեկավարներ, աշխատողներ: Հրավիրված հյուրերի կազմում էին նաև Արարատի մարզպետ Էդիկ Բարսեղյանը, Սյունիքի նորանշանակ մարզպետ Վահե Հակոբյանը և նշված մարզերի համայնքապետեր, ուժային կառույցների ղեկավարներ, արցախյան պատերազմի վետերաններ:
Զորահանդեսն սկսվում է ԲԿ հրամանատարի ՄՊ գծով տեղակալի «Զորահանդես հավսար, զգա՛ստ, դեպի հրապարակ, քայլով մա՛րշ» հրահանգով, հետևում է հայկական մարշի հնչյունները, որի ներքո բոլոր զորամասերը շարային քայլով մտնում են հրապարակ ու շարվում ըստ հերթականության:
«ԼԵՅԲ ԳՎԱՐԴԻԱՅԻ ՊՐԵՈԲՐԱԺԵՆՍԿՈՒ ԳՆԴԻ» քայլերգի խրոխտ հնչյունների ներքո փոխգնդապետ Արման Ոսկանյանի գլխավորությամբ հրապարակ է բերվում 4-րդ զորամիավորման մարտական դրոշը, որպես մարտական փառքի ու արիության խորհրդանիշ և ի հիշեցում` բանակային կորպուսի յուրաքանչյուր զինծառայողի ու իր սրբազան պարտքի մասին:
Իսկ ինչո՞ւ այդ երաժշտության ներքո…
Այն ՆՈՐԻՆ ԿԱՅՍԵՐԱԿԱՆ ՄԵԾՈՒԹՅԱՆ ԳՆԴԻ ՔԱՅԼԵՐԳՆ Է: 1716թ-ին Լեյբ Գվարդիական Պրեոբրաժենսկի գնդի երաժշտախմբին պատիվ է վերապահվել առաջին անդամ հնչեցնել հանրաճանաչ Պյոտր Մեծի Պրեոբրաժենսկու քայլերգը: 19-րդ դարի վերջից Պրեոբրաժենսկի Էլիտար երաժշտությունը դարձավ գլխավոր քայլերգը Ռուսաստանում և մի շարք այլ պետություններում, որը մինչ օրս հնչում է զինվորական հանդիսավոր արարողությունների ժամանակ: Եվ այսօր երեք դար անց այդ քայլերգը կատարում է ԼՂՀ Պաշտպանության բանակի զինվորական նվագախումբը` ղեկավար, զինվորական դիրիժոր ավագ լեյտենանտ Ներիկ Գրիգորյանի գլխավորությամբ:
Սկսվում է տոնահանդեսը: Մասնակիցներին և հյուրերին իր ողջույնի խոսքն է հղում ՀՀ 4-րդ զորամիավորման հրամանատար, գեներալ-մայոր Անդրանիկ Մակարյանը: Նա ներկայացրեց նաև զորամիավորման կազմավորման ճանապարհը, անցած ուղին, ու ձեռքբերումները, մասնավորապես նշելով, որ զորամիավորման անձնակազմը մշտապես զգացել է մարզի ղեկավարության և բնակչության հոգատարությունը, և հավաստիացրեց, որ «զորամիավորման անձնակազմն անելու է առավելագույնը` մարտական պատրաստության առավել բարձր ցուցանիշներ արձանագրելու և հայրենիքի սահմանները անվտանգ պահելու դժվարին, բայց պատվաբեր գործում»: Իր և պաշտպանության նախարարության անունից շնորհավորելով ներկաներին այս տոնական օրվա առթիվ, Նախարարը նաև հավելեց, որ զորամիավորման կազմավորման տարեդարձն առիթ է հետադարձ հայացք նետելով` իրավամբ հպարտանալու 21 տարիների ընթացքում մեր բանակի անցած հաղթական ճանապարհով ու ձեռքբերումներով:
Տոնակատարության մասնակիցներին ողջունեցին նաև Երկրապահ կամավորականների միության նախագահի տեղակալ Ղուկաս Ուլիխանյանը, Վայոց ձորի մարզպետ Էդգար Ղազարյանը: Իր օրհնության խոսքն ասաց Հայաստանյայց Առաքելական Սուրբ Եկեղեցու Վայոց ձորի թեմի առաջնորդ Գերաշնորհ Տ. Աբրահամ եպիսկոպոս Մկրտչյանը:
ՀՀ Պաշտպանության նախարարի հրամանով զորամիավորման մի շարք զինծառայողներ մարտական պատրաստության բարձր ցուցանիշների, բարեխիղճ ծառայության և օրինակելի զինվորական կարգապահության համար պարգևատրվեցին գերատեսչական մեդալներով, արժեքավոր նվերներով և պատվոգրերով:
Տոնահանդեսից հետո թմբուկների համընթաց զարկերի ու շարային քայլերգի ուղեկցությամբ սկսվում է հանդիսավոր երթը.
Մենք հիմա ունենք կարգապահ բանակ,
Զինամթերքի բավարար քանակ,
Ոսոխները բյուր` ազերի թե թուրք,
Ունեն մեր հանդեպ` լուրջ վերաբերմունք:
Ունենք մարտական գիտելիք ու փորձ,
Շարքերը մեր խիտ, ամրակուռ ու հոծ:
Հրապարակ է մտնում 4-րդ ԲԿ վարչակազմը` հրամանատար գեներալ-մայոր Ա. Մակարյանի գլխավորությամբ:
2002թ. հունվարի 23-ին ՀՀ նախագահի հրամանագրով բանակային կորպուսին տրվել է մարտական դրոշ:
Հրապարակ է մտնում ՀՀ Ազգային ու Արցախի հերոս Վազգեն Սարգսյանի անվան առանձին մոտոհրաձգային գունդը հրամանատար գնդապետ Արթուր Օհանյանի գլխավորությամբ:
Գունդը ստեղծվել է 1996թ. մայիսի 21-ին ՀՀ ՊՆ հրամանով: 2000թ. փետրվարի 14-ին գնդին տրվել է մարտական դրոշ:
Գնդի հրամանատար են եղել գնդապետ Մուրադ Կիրակոսյանը, գնդապետ Ռոլանդ Քելեշյանը, գնդապետ Տիգրան Քեշիշյանը, գնդապետ Սուրեն Գևորգյանը, գեներալ-մայոր Ալեքսան Ալեքսանյանը, գնդապետ Գրիգորի Խաչատուրովը, փոխգնդապետ Հովիկ Հայրապետյանը, գնդապետ Մանվել Միրզախանյանը:
Հրապարակ է մտնում N առանձին մոտոհրաձգային գունդը հրամանատար փոխգնդապետ Սամվել Պողոսյանի գլխավորությամբ:
Գունդը ստեղծվել է 1996թ. մայիսի 25-ին ՀՀ ՊՆ հրամանով: 2002թ. հունվարի 19-ին գնդին տրվել է մարտական դրոշ:
Գնդի հրամանատար են եղել գնդապետ Վագիֆ Համբարձումյանը, գեներալ-մայոր Հովիկ Օհանյանը, գնդապետ Տիգրան Փարվանյանը, գնդապետ Արայիկ Մուրադյանը:
Հրապարակ է մտնում N առանձին մոտոհրաձգային գունդը գնդապետ Ալեսանդր Ցականյանի գլխավորությամբ:
Գունդը ստեղծվոլ է 1994թ. մարտի 4-ին ՀՀ ՊՆ հրամանով: 1995թ. սեպտեմբերի 21-ին գնդին տրվել է մարտական դրոշ:
Գնդի հրամանատար են եղել գնդապետ Հովիկ Ազոյանը, գնդապետ Ալբերտ Քարամյանը, գնդապետ Անդրանիկ Փիլոյանը, գնդապետ Տիգրան Փարվանյանը, գնդապետ Արթուր Սարգսյանը:
Հրապարակ է մտնում Գարեգին Նժդեհի անվան առանձին մոտոհրաձգային գունդը գնդապետ Ռաֆիկ Բեգլարյանի գլխավորությամբ: Գունդը ստեղծվել է 1993թ. սեպտեմբերի 2-ին ՀՀ ՊՆ հրամանով: 2001թ. հուլիսի 19-ին գնդին տրվել մարտական դրոշ:
Գնդի հրամանատար են եղել գնդապետ Ղևոնդ Հովհաննիսյանը, գնդապետ Սերյոժա Ստեփանյանը, գնդապետ Համլետ Թանգամյանը, գեներալ-մայոր Արիս Բրուտյանը, գնդապետ Վահան Վարդանյանը, գնդապետ Վիգեն Ավագյանը:
Հրապարակ է մտնում N առանձին խառը հրետանային դիվիզիոնը հրամանատար փոխգնդապետ Հովհաննես Խաչատրյանի գլխավորությամբ: Դիվիզիոնը ստեղծվել է 1996թ. մայիսի 14-ին ՀՀ ՊՆ հրամանով: 2011թ. սեպտեմբերի 15-ին դիվիզիոնին տրվել է մարտական դրոշ:
Դիվիզիոնի հրամանատար են եղել գնդապետ Սեդրակ Սեդրակյանը, փոխգնդապետ Հովիկ Հոխիկյանը, մայոր Վախթանգ Զաքարյանը, փոխգնդապետ Գևորգ Գևորգյանը:
Հրապարակ է մտնում N առանձին կապի գումարտակը հրամանատար փոխգնդապետ Անդրանիկ Պողոսյանի գլխավորությամբ: Գումարտակը ստեղծվել է 2000թ. հունիսի 24-ին ՀՀ ՊՆ հրամանով: 2011թ. սեպտեմբերի 15-ին գումարտակին տրվել է մարտական դրոշ:
Գումարտակի հրամանատար են եղել կապիտան Արթուր Ալեքսանյանը, փոխգնդապետ Արա Սարգսյանը, փոխգնդապետ Անդրանիկ Մանուկյանը, փոխգնդապետ Նիկոլ Խոջոյանը:
